L’accesu dende la carretera de la costa N-632 atópase nos alredores del llugar de Torre, unos 7 km al oeste de Ribeseya. D’ellí parte una carretera asfaltada de 2 km que nos empobina hasta la mesma sablera de Vega.

A pocos metros del estremu oriental del aparcamientu de la playa pue reparase nel calizu y la dolomía de la Formación Xixón, a lo que se superpón una socesión rítmica de calizu y marga cardoso escuro (Formación Rodiles). Esto postrero, dispuesto n’estratos entornaos escontra’l leste, contién bien de fósiles marinos, como braquiópodos, belemnites, ammonites, bivalvos, etc.

Percima d’esta serie rítmica dispónse una capa de conglomeráu de cantos silíceos de 1 m d’espesura y depués alternancies d’arenisca cardoso y lutita colorao perteneciente a la Formación Vega, d’orixe fluvial. Aproximao a unos 8 m percima de la capa de conglomeráu, pue vese un estratu d’arenisca entornáu unos 50^o escontra’l nordés, que no fondero pue reparase en delles pisaes tridáctiles de dinosaurios bípedos.