L’itinerariu empieza nel panel esplicativu asitiáu na vera derecha de la ría, namás degolar la ponte que la crucia, bien averada al camping.

Al xacimientu pue llegase tanto pela sablera como per un camín señalizáu que lu bordia, colo que se pue visitar inclusive de mar llena. A unos 500 m del panel esplicativu apaecen, na superficie d’un bloque sueltu d’arenisca acolorazao perteneciente a la Formación Vega, dos salientes d’escala decimétrica que correspuenden a contramoldes d’una marca de la mano y otra del pie de dinosaurios cuadrúpedos, empobinaes en direcciones opuestes.

Siguiendo pel cantu de la cortada otros 150 m, llégase a un estratu d’arenisca un poco entornáu escontra la mar que tien la superficie travesada por diaclases (resquiebres d’orixe tectónicu) en delles direcciones, y que contién delles marques de terópodos peresgastaes pola erosión marina. A menos d’un metro percima, apaez un calizu cardoso de la Formación Tereñes que contien fósiles pequeñinos de gasterópodos y delles depresiones subcirculares escomanaes (d’hasta 1,25 m de diámetru) qu’amuesen un oriellu periféricu abultáu. Trátase d’icnites de grandes dinosaurios saurópodos que se movíen per una llaguna costera. Poles sos dimensiones atópense ente les mayores del mundu; el so caltenimientu deficiente quita de poder facer una observación detallada d’elles. Amás d’éstes, pue reparase nun rastru formáu por nueve pisaes que correspuenden tamién a un saurópodu, anque de tamañu pequeñu.

Unos 30 m más allá, obsérvase una arenisca colorao de la Formación Vega que contién marques de raigaños verticalizaos de color verde pálido correspondientes a paleosuelu vieyo asitiao nes orielles del calce d’un ríu xurásicu.